Ka 'oo ka ‑aa muɛ tʋ 'a "jru kpaa' se
60
'Dʋ ‑wlʋa 'e 'dʋ ‑jeopoi 'a 'sbɛ 'di ɛ, ɛɛ' 'dʋ tu Dafi ‑crɩɛ ɛɛ poɛ nyʋ dɩ ‑nʋʋa 'a "kuan', ‑wɛe ɩ 'je nyʋ dɛtɔɔ‑.2 Dafi ke Siriɛnyʋ ‑wlʋa Mesopotami ke Siriɛn ‑wlʋa Soba ʋʋ ‑fɔn' tʋ, ‑wɛe Soabʋ ‑mɔ ji' ‑ke ‑mɔ bla Edɔmʋ 'a ‑kwlʋdue' "wlu 'sɔɔn 'de 'Tɔn 'ɔ wlao 'di.
3 'Oo Kea, ‑ɩn ‑bɔ ‑a ‑ʋn ‑ɛ,
‑ɩn ‑craa ‑aa tʋ ‑fɔn' nyʋ i,
‑ɩn ja ‑a ‑ma 'cɛn klaa" "kpei. Kaan ka la 'jaa,
‑ɩn kpa ‑a "jɛi.
4 ‑Mɔ ‑nʋɛ ‑wɛe 'blʋa a crɛ,
‑ɩn ‑sɛ 'fɔe: ‑ɩn ‑pa" ɛɛ' ‑po" dɛ ‑nʋɛ ɛɛ ‑suua' i.
5 ‑Ɩn ‑jaa ‑ma 'cɛ 'de 'kle klae" 'di.
‑Ɩn kpʋn ‑a klan" ‑klan klan" ‑ɩn tba ‑a kmaa nmɔ wɔn.
6 Nyʋ ‑ʋʋ tba ‑mɔ ‑Kea tɔi" ɛ,
‑ɩn ‑to "jriɛ o sie dɛ jrɛ' ‑wɛe ‑mʋ ‑wi" 'je ʋʋa' tʋnyʋ 'a 'sɩn "i ‑gbla". ‑Te' ‑kwlʋ.
7 ‑Bo ɛ nɩ kan' ‑wɛe ‑ma ‑tɩ' kmanyʋ 'je ‑seie,
‑ɩn ji, ‑ɩn ‑pʋʋ' ‑a ‑ʋn, ‑ɩn kpʋn ‑aa baewlu‑.
8 Kea wlu' ka 'de ɛɛ' ‑gbu" ‑kwea i 'di:
'Ma muɛ tʋ 'a "jru kpaa'
'ma muɛ Sisɛmʋ 'ʋn ‑seea',
‑wɛe 'ɩn 'je Sukɔtɩ dbaa‑.a
9 'Mɔ ‑kpa' Galaadɩ, 'mɔ ‑kpa' Manase',
Eflaimʋ nɩɛ 'ma ‑gbla ‑o,
‑wɛe Suida nɩ 'ma 'beɔ tu.
10 Moabʋ nɩɛ 'ma jre na' ‑o,
'Ɩn ‑teɛ' Edɔmʋ bʋ "kpei.
'Ɩn ‑saa 'mʋa‑ nʋ ‑cnuɛn" 'de Filitɛn ‑wi" "kpei.
11 Nyɔ ‑je 'ʋn 'bo Edɔmʋ kpa‑?
Nyɔ ‑je 'ʋn 'de ‑kwlɔ ‑pooa 'saan 'dei 'di kpa‑?
12 ‑Ɛ se ‑mɔ nɩ, 'oo Kea?
‑Mɔ ‑fuun ‑a nyai,
‑mɔ ‑bɔa ‑aa "sʋɩ tʋ 'ʋn kpa ‑tɩ ɛ, 'oo Kea.
13 Ɛ seie ‑aʋn 'de ‑aa tʋnyʋ 'kwa.
Dɛ ‑nʋɛ nyiɔ seɛ 'bɛɛ ɔ 'je ‑a kwawɛi ‑te'.
14 ‑A ‑ke Kea na' ‑aa muɛ dɩ klae" "klae nʋa'.
Ɛmɛ ‑je ‑aa tʋnyʋ "kpei na‑.